Temporär Subventioun vum Verkafspräis vu Masutt

No der aussergewéinlecher Erhéijung vum Pëtrolspräis op Grond vun der internationaler Situatioun, huet d'Regierung decidéiert eng temporär Ofsenkung vum Verkafspräis vum Heizueleg (Masutt) vu 7,5 Cts/l TTC anzeféieren.

Dës spezifesch an zäitlech begrenzt Mesure trëtt automatesch a Kraaft, Dir braucht keng weider Schrëtt z'ënnerhuelen. Si ass Deel vun de Mesuren, déi de 24. Mäerz 2022 am Kader vun den Tripartite-Gespréicher mat de Sozialpartner entscheet goufen.

Weider Informatiounen a Rotschléi fir Ären Energie-Konsum ze reduzéieren an esou nach weider ze spueren, fannt Dir op www.energie-spueren.lu.

FAQ

1. Wéi eng Demarchë muss ech ënnerhuelen?

Dës Moossnam gëllt automatesch, Dir braucht näischt ze ënnerhuelen.

2. Wéi laang gëllt dës Mesure?
  • D'Reduzéierung vun den Heizkäschten (Mazout) trëtt den 16. Mee 2022 a Kraaft a gëllt bis den 31. Dezember 2022.
3. Wat ass de finanziellen Impakt vun der Mesure fir mech?

Doduerch dass de Staat fir verschidde Pëtrolsproduite 7,5 Cts/L TTC iwwerhëlt, gëtt dës Präishausse ofgefiedert. De genaue finanziellen Impakt hänkt vun Ärem perséinleche Konsum of. Bei engem Verbrauch vun 3.000 Liter Masutt, géift Dir esou 225 Euro spueren.

Wéinst der aktueller Situatioun vum Marché, kënnen d'Pëtrolspräisser trotz dëser Mesure méi deier ginn. An deem Fall, gëtt den Impakt vun esou enger Hausse duerch dës Moossnam amortiséiert.

4. Vu wéini u profitéieren ech vun dësem finanzielle Virdeel?

D'Reduzéierung vu 7,5 Cts/L TTC gëtt automatesch an direkt applizéiert.

Aktualiséiert